喉嚨痕痕地，又好想飲啖湯，見有網友分享依個青紅蘿蔔桔餅湯，話可以止咳、潤肺同化痰(又好似幾啱我依家狀況)。覺得好似幾得意，加上青紅蘿蔔同桔餅我都鐘意飲，唔知加埋一齊係咩味，所以就買齊材料又試下啦
其實同我平日成日煲嘅青紅蘿蔔瘦肉湯都係差不多，只不過就係用左桔餅嚟代替蜜棗或無花果。但加左依個桔餅就可以即刻可以止咳同化痰，聽網友仔分享就好利害，飲兩碗就即刻咳少左。依排成日喉嚨痕痕導致咳，所以我都真係有啲期待呀！
青、紅蘿蔔各一條、瘦肉約$30、桔餅1塊半、南北杏1湯匙及陳皮一片
青紅蘿蔔洗淨去皮切件
桔餅只需要用水沖一沖，然後切碎；陳皮浸軟刮去皮瓤；南北杏洗淨
瘦肉洗淨汆水
煲內放約3L水，然後隨水加入陳皮
待滾起後，加入所有材料
繼續用大火加蓋煲約15分鐘
之後轉慢火加蓋煲多1.5小時
最後加鹽調味，就可以飲得啦
比起平日煲嘅青紅蘿蔔瘦肉湯味道又真係有啲唔同，雖然仍然有好香嘅蘿蔔味，但就多了一份甜甜地嘅味道，飲落又真係唔錯！
我最期待嘅止咳方面又點，我就覺得飲完喉嚨痕痕嘅情況又真係少左啲，少左痕就自然少左咳啦。
不過每人體質不同，就連咳都有分寒咳定熱咳，所以真係要試才知道。不過我覺得味道又唔錯，可以煲起一家人飲當保健都未嘗不好，始終多啲湯水飲，人都健康啲嘛！
溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！
